Kultura arteko bazkaria egin dute Aretxabaletako mojen komentuan. 100 bat lagun elkartu dira. Orain dela 6 urte hasi zuten ekimena; hain zuzen, SOS Racismo elkarteak antolatutako ekintza batetik dator Aretxabaletako ekimena. "Etxeetan egitea zen hasierako ideia, baina guk formatua aldatu eta elkarte gastronomiko batean egin izan dugu orain arte; lekua txiki geratu zaigunez, aurten komentuan egitea proposatu dugu", azaldu du Paloma Martinez antolatzaileak.
Harreman berriak sortzea
Helburua bertakoen eta etorkinen artean harreman berriak sortzea dela dio Martinezek. "100 lagun inguru elkartu gara: bakoitzak etxetik ekarri du jateko zerbait eta denon artean banatu dugu. Bazkal ondoren Basotxokoak etorri dira kantuan egitera; eta, ondoren dantzan ibili gara", azaldu du Martinezek.
"Hemengoei dantzan egitea kosta" egiten zaiela dio Martinezek, baina poliki-poliki jendea animatu dela aitortu du.
