Abenduaren 3arekin batera Euskararen Nazioarteko Eguna dator eta horren bueltan antolatu gura diren ekintzak zehazten jardun zuten elkartutakoek. Ospakizun eta, era berean, aldarrikapen eguna izango den horretan euskara kalera atera gura dute ahal den ahobizi eta belarriprest guztiak elkartuta. Horregatik, hain zuzen, ospakizunak herriaren erdigunean bakarrik egin beharrean inguruko guneetara zabaltzearen garrantzia aipatu zuten. "Zergatik ez egin ekitaldiak Portasol aldean eta Bedarreta inguruan, eta gero guztiok elkartu herriaren erdian dagoen guneren batean?". Ekitaldiak gehiago zehaztekotan geratu ziren hurrengo bileran.
Datorren urtean, ariguneak
Euskaraldiaren gogoeta urtea izan da 2019a, orain dela urtebete egindakoaren balorazioa egin eta aurrera begira jartzekoa. 2020ko azaroan etorriko da bigarrena, eta oraingoan, bi lagunen arteko elkarrizketez gain –ahobizi eta belarriprest rolak hartuta–, modu kolektiboan, taldeetan, ere egin ahal izango da ariketa; horretarako, ariguneak izendatuko dituzte. Hori guztia antolatzen hasiko dira Aretxabaletan ere.