Hainbat lekutako produktuak jan eta edateko aukera izango da Aretxabaletako 23. Gastronomia eta Folklore Jaialdian domekan. 10:30ean hasita, desfileak egingo dituzte. 12:30ean, Herriko Plazan, Errioxako Voces Del Ebro taldearen emanaldia izango da, baita Galizia etxeko taldearena eta Gaztela eta Leongo San Fernandorena ere. Goiz osoan zehar, postuak egongo dira.
Etxeko patxarana lehian
Aurten ere patxaranak bere lekua izango du, eta 25. aldiz egingo dute Etxeko Patxaran Lehia-keta. Antolatzaileek jakinarazi dutenez, parte-hartzaile bakoitzak bi botila aurkeztu ahal izango ditu, gehienez, eta patxaranak norberak egindakoa izan beharko du. Kristalezko edo beira gardenezko botilan aurkeztu beharko da eta botilen originaltasuna ere kontuan hartuko du epaimahaiak. Sariei dagokienez, lehen postua eskuratzen duenak 100 euro jasoko ditu; bigarrenak, 75; eta hirugarrenak, 50. Diruaz gain, trofeoa ere jasoko dute.