27 talde izango ditu denera UDAk denboraldi berrian. Bost kirol, esan bezala, baina, ohi bezala, jendetsuena, futbola. Futbolean, hiru talde dituzte mutiletan seniorretan, gazte mailan, kadeteetan eta infantiletan –bakoitzean–, eta beste hiru ditu nesketan Leintz Arizmendik, seniorrena, kadeteena eta infantil mailakoa. Horiekin batera, futbol eskolan ariko dira beste hainbat neska-mutiko. "Argi geratzen da zergatik behar genuen futbol zelai berria, denok ez gara sartzen bestela", zioen Agurtzane Elkoro presidenteak.
Kirolari horiekin denekin 40-45 hezitzailek jardungo dute lanean. "Aretxabaleta herri kirolaria da, eta gaurko argazkiak erakusten du hori. Eta kirola osasuna da", zioen Elkorok.
Denboraldi berrirako taldeez gain, beste nobedade bat ere izan zen atzo Ibarran. Izan ere, bertan izan zen aurrerantzean UDAren kudeatzaile –gerente– izango dena, Ane Larrañaga ibarratarra. Orain arte klubak ez zuen figura hori, baina beharrezko ikusi dute lanpostu hori sortzea, UDAk duen bolumenagatik.