Orain dela bost urte antolatu zuten Gazte Eguna azkenekoz, 2014an, eta urtebete beranduago, Kuadrillen Eguna. Ordutik ez da egon halako egunik, eta, Atxabaltako Gazte Mugimenduak horri berriz heltzea erabaki du: "Andramaixen harira, gazte mugimendua asko indartu da eta horren emaitza da Gazte Eguna. Gazteak elkar ezagutu, harremanak estutu eta batzeko beharra dagoela ikusi dugu, eta horretarako egun bat izango da. Andramaixen bueltan sortutako guztiari jarraipena eman nahi diogu", diote. Horregatik asko elkartzea gurako lukete, "ahalik eta gehien hobeto".
Jolasak, bazkaria eta musika
Otala Zelain elkartuko dira; hain zuzen, betiko formatuetatik irten nahian hautatu dute Aozaratza auzoko zelai ezaguna: "Buelta bat eman nahi izan diogu Gazte Egunari, eta horretarako leku oso aproposa dela iruditu zitzaigun. Halako txokoak gehiago aprobetxatu beharko genituzke".
Goiz erdian (11:00) igoko dira eta gazte jolasak egingo dituzte han (13.00). Bertan bazkalduko dute (14:30) eta bazkalostea girotuko die Upeide taldeak. Jaitsitakoan (18:30) jai giroan jarraituko dute elektrotxarangarekin. "Upeide taldearen bueltan herriko gazte ezberdinak batu dira bazkaria girotzeko. Horrelako ekintza herrikoietan hartzen dute parte eta oraingoan ere hortaz gozatzeko aukera izango dugu", argitu dute.
Hurrengo pausoak erabakitzear
Ondo pasatzeko eta harremanak estutzeko eguna bada ere beti izaten dela hausnarketarako eta ideiak partekatzeko aukera adierazi dute eta aurrera begira erabakitzear dagoela guztia diote: "Jai honekin azken hilabeteetan egindako lanari jarraipena eman nahi diogu, beraz gazte egunaren ostean erabakiko dugu zeintzuk diren hurrengo pausuak. Mugimenduak aldakorrak dira baina ez dira inoiz eteten. (H)aria ez da etengo!"