Hiru gune horietan segurtasuna bermatzea da kamerak jartzearen arrazoia Udal Gobernuaren esanetan: "Gerta litezkeen bandalismo ekintzak kontrolatzeko". Eta gogorarazi du ekainean, Santa Rita komentuan sartu zirela, Kurtzebarri institutukoek erabiltzen duten gela batean: "Teknologia tailerra dute han, eta materiala apurtu eta lapurtu zuten, baita inguru guztia zikindu ere pinturarekin", azaldu du Unai Elkoro alkateak. Hain zuzen, gertaera horren ondorioz itxita dago komentuko lorategia. "Hainbat aukera aztertu ditugu, horien artean, eraikineko lehen solairuko leihoetan burdin hesiak jartzea, baina
azken horiek kamerak baino garestiagoak dira", zehaztu du alkateak.
Kontrol zentroa udaltzainen bulegoan
Komentuko lorategian bideozaintzarako bi kamera jarriko dituzte sarrera bakoitzean bana, eta kontrol-zentroa udaltzainen bulegoan jarriko dute. Eta beste bi gunetan ere bina kamera jarriko dituzte: Iturrigorri pilotalekuan –hemen pintadak saihestea da helburua– eta kiroldegi aurrean eraikitzen dabiltzan zazpiko futbol zelaian.
Kamera horiek kontratatzeko prozesua abian dago eta, horretarako, 10.000 euro inguruko inbertsioa egingo dute. Kamera bidezko zaintza sistema hau hilabete honen bukaerarako edo urri hasierarako martxan egotea gurako lukete udal arduradunek.