Gozatu polita hartu zuten ziklistek zapatu goizean, Debagoienean irail eta urrian egingo dituzten martxetako lehenengoan. Aretxabaletako plazatik irten eta Mendiolatik eta Leixargaratetik gora ziklistek hauspoa berotzeko tartea izan zuten, baina behin Mugarriluzeko tontorrera iritsita, arnasari buelta eman eta Degurixako baso eta Kurtzebarriko bazter ezkutuez gozatu ahal izan zuten: "Akaso, beste martxa batzuetan bidezidor gehiago egoten da, baina guk egindako ibilbidean izan ditugun bistak leku gutxitan izaten dira, ederra izan da".