Futbolaren bueltan elkartu dira Debagoieneko 54 neska-mutiko astelehenetik gaur arte, UDAk antolatutako campusean. Futbola ardatz, beste hainbat kontu landu dituzte 9 eta 13 urte bitarteko gaztetxoekin; ingelesa eta emozioak, bestea beste. Horren guztiaren berri emango diete gurasoei gaur arratsaldean egingo duten ekitaldian.
Ibarra futbol zelaia izan dute erdigunea, eta Kurtzebarri eskola jatorduetarako zein lotarako gunea. Bitartean, hara eta hona ibili dira; Landara eta Zubietara, besteak beste. "Futbolaren gainean ikasteko elkartu gara, baina hori baino asko gehiago egin dugu; emozioen lanketa, esaterako. Iñaki Otxoa de Olzaren gaineko ikus-entzunezkoa ikusi dugu, eta horren gainean hausnartu. Oso gustura jardun dute", dio Iker Arriolabengoak, campusaren arduradunak. Elikaduraren eta balioen gaineko lanketak ere egin dituzte: "Elkarbizitza sustatu da, harremanak landu, eta pertsonak erdigunean jarri".