Orain dela ia bi urte, 2017ko abuztuan, Pirinioetako Balaitus mendian hil zen Mikel Crespo Zuazua gazte aretxabaletarra izango dute gogoan aurten ere, Bizir Egunarekin. Haren senideak, lagunak eta gertukoak elkartuko dira, bigarren urtez, eta herritarrei ere eskainiko dizkiete eurekin bat egiteko uneak.
Iaz legez, mendi buelta egingo dute goiz partean, Kurtzebarrira; Mendiola auzotik abiatuko dira (09:15). Eta egunak iluntzean izango du jarraipena (19:00), hainbat kontzerturekin girotuko dute-eta Arlutzeko kantxa; hona hemen musikariak: Ekiñe Casado arrasatearra; Krisis talde aretxabaletarra; Gari musikari ezaguna; eta Leire Etxezarreta eta Eider Garro trikitilariak. Antolatzaileek iragarri dute txosna jarriko dutela kontzertuen gunean (18:00).
