Gipuzkoa Ogiberri taldeko Garazi Estebez txirrindulari aretxabaletarrak irabazi du Euskaldun txapelketa. Zapatuan, Ugao-Miraballesen (Bizkaia) jokatutako lasterketan lehenengo ezin zuen, eta atzo, Ubarraundian (Araba) bigarren. "Valentzian egon naiz egunotan, Europako pistako txapelketa gertatzen, eta, halako uste barik hartu nuen parte bi lasterketa horietan".
Ugao-Miraballesen 87,8 kilometroko ibilbidea izan zuten (1:44:44), eta lehenengo helmugaratu zen Estebez junior mailan. Atzo, ostera, Etxabarri Urtupina-Ozaeta aldean jokatu zen lasterketan (78 kilometro) bigarrena izan zen, lasterketa irabazi zuen Ana Usabiagarekin batera helmugaratuta (02:04:46).
"Ez nuen halakorik espero, parte hartzera joan nintzen, beste barik; pentsa, dagokidan arropa ere ez nuen eraman…", adierazi du Estebezek pozik, eta gaineratu du: "Aurreko egunetan Valentzian egon naiz federazioarekin Europako pistako txapelketa gertatzen. Datorren hilabetean jokatuko da hori Belgikan".
