Oihana Aldaik urtebeteko ibilbidea egin du Realean, eta arlo pertsonalean ez horrenbeste, baina talde moduan urte bikaina izan da. Arlo pertsonalari dagokionez horixe falta izan zaio, gehiago jokatzea, Gonzalo Arkonadak bi norgehiagokatan aukeratu duelako hasierako hamaikakoan egoteko –atzo ere titularra izan zen Euskal Herria Kopako finalerdian–. "Realera etorri nintzenean banekien zein egoeratan egon behar nintzen, Mariasun Quiñones oso egonkortuta zegoelako taldean. Baina, ikastera eta postuagatik borrokatzera etorri nintzen", adierazi zion GOIENAri duela aste gutxi.
Talde moduan, Aldaik eta gainontzeko ordezkariek erregina Kopa ekarri zuten Granadatik, eta denboraldi amaieran bizi izandako dena bihotzean eramango du aretxabaletarrak. Eta ez da gutxi. Atzo, berriz, agur polita izan zuen Mojategin, asko maite duen berdegunean, eta Alavesen aurrean oso partidu txukuna eginda agurtu ahal izan zen. Bada, Reala jokalarien etorkizuna zehazten hasi den honetan argitu du Aldaik ez duela Realean jarraituko.