Antxintxika Triatloi Taldeak 45 kide izango ditu aurten: "Zenbateko nahiko egonkorra da, baina urtero ditugu taldekide berriak, aurten sei lagun berri etorri dira". Izan ere, Debagoieneko triatloi taldeak zabalik ditu ateak: "Lagun talde bat gara, ez gara profesionalak, eta badirudi talde batean sartzeko errendimenduari dagokionez kirolariarekin exijentziak izan behar ditugula. Ez da gure kasua, inondik inora. Bakoitzak ahal duen neurrian egingo du kirola, eta lasterketak ere denetarikoak daude, badaude distantzia motzak ere".
Taldekideak lasterketa batetik bestera dabiltza, duatloi denboraldia amaituta dagoeneko triatloietan dabiltza-eta buru-belarri: "Aurten normalean baino geroago aurkeztu dugu taldea. Azken orduko babesleak izan ditugu eta arropak beranduxeago atera ditugu". Hala, probetan gozatua hartu bai, baina eurenak ere antolatuko dituzte: "Ekainaren 16an izango dugu Tritxikia, eta sekulako poztasuna ematen digu gazteei zuzendutako kirol hitzordu hori antolatzea, egun horretan izaten duten irribarrea eta zelan pasatzen duten ikustea ederra delako. Eta gero, urtero moduan, Behobia-Donostia lasterketa baino astebete lehenago Antxintxika Krosa antolatuko dugu, Soraluze eta Bergara artean egiten duguna. Gogoz gaude aurten ere".
Amaitzeko, babesleei eskerrak eman dizkie Antxintxikako ordezkariak: "Servimasak urteak daramatza gurekin eta zelan eskertu ere ez dakigu. Goiena aseguruak, Mobel... Eta orain Oreka Eskoriatzako bizikleta dendaren laguntza ere badugu, eskerrik asko denei".
