Gazte egin zituen lehenengo hartu-emanak futbolarekin Bixente Etxeandia aretxabaletarrak. UDAn hasi zen jokatzen eta lehenengo eta bigarren mailetako hainbat taldetan aritu zen jokalari. Baina, jokalari aritzeaz gain, entrenatzaile ere izan zen, eta, UDAko presidente moduan 10 urte bete zituenean, 2005ean, klubaren urrezko bereizgarria jaso zuen. Makina bat lan egin du futbolaren eta herriko futbolarien alde, eta, horren adierazgarri, gogoan izango dute beti aretxabaletarrek Etxeandia.
Jokalaria eta entrenatzailea
18 urterekin hasi zen futbol jokalari. UDAn egin zituen lehen urratsak 1949-50 denboraldian eta 1952. urtera arte ibili zen jokalari bertan. Ondoren, urrezko garaiak bizi izan zituen Deportivo Alaves taldera egin zuen salto eta bertan aritu zen 1957. urtera bitartean. 1954-55 denboraldian 22 gol sartu zituen Lehenengo Mailan. Horrez gainera, babazorroen taldean aritu zen sei denboraldietatik bitan gol gehien sartu zituen jokalaria izan zen hura, eta Alaveseko istorioan gol gehien sartu dituzten jokalarien artean hirugarrena ere izan zen Etxeandia. Lehenengo Mailan jarraitu zuen aurrera, Granadan. Baina Alaves taldera ere egin zuen buelta berriz eta Bigarren Mailako Huelvan aritu zen ondoren. Futbol jokalari ibilbidea amaitzeko, Sestaon, Mirandesen eta Club de Vitorian egin zituen baloiarekin azken urratsak. Jokalari lanak utzi eta gero, 1986an entrenatzaile titulua atera zuen Etxeandiak eta hainbat mailatan aritu zen taldeak zuzentzen. Maila ona erakutsi zuen entrenatzaile moduan ere: Bergaran, Hirugarren Mailan; Mondran, Hirugarren Mailan; Alavesen, Erregionalean; eta Elorrion, Erregionalean.
Merezitako omenaldia
87 urte zituela zendu zen Etxeandia, eta, hain zuzen ere, merezitako omenaldia egingo diote Ibarrako futbol zelaian, 16:30ean, Tolosaren aurkako futbol partidua hasi aurretik. UDAko talde guztiak izango dira zelaian, 400 neska-mutiletik gora egongo dira-eta bertan. Ibilbide profesionalean Alaves futbol taldearekin izan dituen bizipenak ere ugariak eta garrantzitsuak izan dira: bai jokalari moduan arituz, eta baita ikuskatzaile lanak eginez hainbat denboralditan. Hala, Gasteiztik Alaves futbol taldearen ordezkaritza bat ere etorriko da domekan Ibarrara, egun Alaves taldeko kapitaina den Manu Gartziarekin batera, hain zuzen. Oroigarri gisa, UDA taldearen eta Alaves futbol taldearen kamiseta banarekin osatutako koadro bat jasoko dute senitartekoek.