Junior mailako ziklistarik onena izan da Garazi Estebez (Gipuzkoa-Ogi Berri) Dos Hermanasko zirkuituan. 23 urtez azpikoek zirkuituari lau itzuli egindakoan ekin zioten juniorrek lasterketari, eta Aretxabaletakoak nagusiekin batera egin zuen lasterketa osoa, aurreko taldean. Hain zuzen, Estebez nagusiekin batera egindako esprint erabakigarrian sartu zen, eta beste behin azken metroetan daukan abiadura erakutsi ahal izan zuen, sailkapen orokorrean bosgarren sailkatuta –junior mailan lehenengoa–. Bada, Estebezek atzean utzi zituen kontrario zuzen Julia Sanchez eta Ania Horcajada –lider berria– helmugan.
Hala, pistan egindako denboraldi ederrari errepidean jarraipena ematen dabil aretxabaletarra.