Oinarrian orain arteko egitura izango du MUko Ikus-entzunezko Fakultateko ikasle eta irakasleek martitzenean estreinatu eta egubakoitza bitartean egingo duten hamabigarren Huhezinema euskal film laburren jaialdiak: egubakoitzean, hiru sailetan jaso dituzten lan onenen sariak banatuko dituzte Arkupen –Sail Ofiziala, MUko Ikasleen Saila eta Kutixi saila–; 16:30ean hasiko da ekitaldia.
Publiko guztiarentzako askotariko ekitaldiak iragarri dituzte egubakoitza aurretik, Arkupen, 16:00etan hasita: "Nazioarteko hiru film labur eta Josu Martinezek zuzendutako Jainkoak ez du barkatzen filma eskainiko ditugu martitzenean; eguaztenean, Agur, Etxebeste! filmeko lantaldekoen hitzaldia izango da, eta ondoren, efektu berezien makillaje erakustaldia egingo dugu Herriko Plazan; eta egunean, MUko ikasleen eta Kutixi saileko lanak eskainiko ditugu".
