Debako taldea sailkapeneko laugarren postuaren bila etorri da, eta etxekoak, ostera, azpiko taldeengandik aldetzeko helburuarekin zelairatu dira. Eta horretarako biek ala biek puntuak behar. Lehen zatian ez dute aparteko jokorik egin ez batak ez besteak, eta lehen gola Amaikak Batek sartu du 38. minutuan. Atsedenaldia iristear zela berdinketa lortu dute etxekoek, Jon Anderrek hain zuzen ere; eta hori garrantzitsua izan da UDAkoendako atzetik ibiltzearen zamarik ez hartzeko.
Zalantzak sortu dituzten penaltiak
Bigarren zatia, ostera, gorabeheratsua izan da. Epaileak kanpokoen aldeko penalti bi adierazi ditu bata bestearen atzetik 60. minutuaren bueltan. Lehenengo jaurtiketa urrundu egin du Iker Arriolabengoa atezainak, baina jokaldi horretan Gilenen falta ikusi du Amaikak Bateko jokalari bat lurrera botatzearren. Zaleek ez dute halakorik ikusi eta berotzen hasi dira. Etxeko jokalariak, ostera, burumakur geratu beharrean, piztu egin dira gol horrekin eta Debakoak estutzen hasi, baita aukeraren bat edo beste sortu ere. Eta orduan kanpokoen hirugarren gola iritsi da defentsaren nahaste une bat aprobetxatuta.
Azken uneetan dena eman gura izan dute etxekoek, eta Asier Urzelaik egin du gola. Berdinketa hurbil ikusi dute eta saiatu ere egin dira; azken jokaldian, esaterako, Arriolabengoa ere Debakoen atera joan da, baina ezin izan da lortu.
