Aretxabaletatik Euskal Herrira eta Euskal Herritik mundura, herrigintzari begira etorkizunerako ikuspuntuak eta hausnarketak azalduko ditu Sarasuak. Eta horretarako hainbat abiapuntu aztertuko ditu bertaratzen direnekin.
Lehenik eta behin, XX. mendeko ideologiek gaur egungo gizartean izan duten eraginagatik, hauetatik mantentzea interesgarria izango liratekeen puntuez, eta aldi berean, baztertu beharko liratekeen horietaz arituko da. Horrekin Euskal Herriko herrigintzarako ekarpen posibleen inguruko hausnarketa sustatu gura du. Sarasuaren arabera, irekitasunerako behar handi bat dago gaur egungo gizartean, eta hain barneratuta dauden ziurtasun ideologikoak lasaitzeko beharra ikusten du; horretarako, iturri ezberdinak begiratzea komeni da. Herrigintzaren garapenerako norabide interesgarri batzuk aztertzen ibili da irakaslea, eta dioenez, betaurreko bifokalekin aztertu beharra dagoen gaia da, hau da, bai gertuko ikuspegi batetik eta baita ikuspegi global batetik ere.