Emakumeen Frontenis Txapelketaren lehen kanporaketa gaindituta jakinekoak dira azken faserako sailkatu diren lehen bi bikoteak: Miren Rubio eta Maitane Mañarikua eta Agurtzane Elkoro eta Oihana Mata. Azken bikote horrek, beste baten ordez jokatu zuen, baita sailkatzea lortu ere. Joan den zapatuan Aretxabaletako eta Elgetako bina bikotek jardun zuten nor baino nor gehiago, eta Arrasateko batek. "Goiz benetan polita pasatu genuen, nahiz eta ikusle asko ez gerturatu", adierazi du Oihana Matak.
Domekan, UDAk antolatutako txapelketaren bigarren kanporaketa izango da (09:00etatik 13:00ak bitartean), eta Iturrigorri pilotalekuan elkartuko dira honako jokalariak: Rosa Ojuel eta Lore Martinez, Idoia Serna eta Idoia Elkoro, Bea Zabala eta Rakel Zamalloa, Maite Fraile eta Amaia Gaztañaga, eta Laura Saez eta Inge Sancristobal.
Lehenengo bi bikoteak sailkatuko dira oraingoan ere martxoaren 8ko final-laurdenetarako.