Hasieratik partiduaren bila atera dira zelaira etxekoak, eta 31. minutuan lortu dute lehen gola. Urko Pamies de la Hera izan da goleatzailea, jokaldi eder bat modu bikainean bukatu ostean.
Atsedenaldira aurretik joan da UDA. Hala ere, bigarrenean berdintzea lortu dute lesakarrek –Oier Iantzik sartu du gola, 57. minutuan–. Etxekoek ez dute etsi, eta hamar minutu beranduago, berriz ere aurreratzea lortu dute, Igor Oiangurenen golari esker. Pozak gutxi iraun die aretxabaletarrei, bi minutu beranduago berdindu egin dute bigarrenez, Ander Ordokiren golarekin –69.minutua–.
Hortik aurrera, nahi eta ezin etxekoek. Aukera garbiak izan dituzte, baina ezin hirugarrena sareratu. Puntu banaketa, beraz, amaieran. Datorren astean Elgoibar aurkari zuzenari egin beharko dio aurre UDAk, etxetik kanpo.
Mondrak eta Bergarak, galdu
Ohorezko Erregional Mailako beste bi ordezkari debagoiendarrek galdu egin dituzte euren partiduak. Mondrak, 3-0 galdu du Zarautzen eta Bergarak, berriz, ezin izan du Hernaniren aurka etxean (1-2).
