Kanabalen Batzordeak eguaztenean egindako bileran lokalaren erabilera arauak zehaztu zituen. Hara sartzeko giltza Arkupe kultura etxeko harreran eskatu ahal izango da otsailaren 1etik aurrera, 20 euroko fidantza ordainduta –giltza bueltatzean itzultzeko–. Erabiltzaileek hainbat konpromiso hartu beharko dituzte orduan. Hona hemen garrantzitsuenetako batzuk: talde bakoitzak arduradun bat izango du, konpromiso dokumentua sinatuko du horrek, eta berea izango da taldekideek egiten dutenaren erantzukizuna; giltza arduradunari emango diote, eta debekatuta dago kopiak ateratzea; adin txikikoen kasuan, ardura heldu batek izango du eta horrek sinatuko du konpromiso dokumentua; gainera, lokalean bertan egon beharko du gaztetxoekin. Talde bakoitzak bere tresnak eta materiala eramango ditu, eta lan jarduna bukatzean garbi eta txukun utzi beharko du guztia; eta gauez ezingo da erabili lokala.
Herri bazkarirako txartelak
Aratuste-domekako herri bazkarirako txartelak otsailaren 2an, zapatua, jarriko dituzte salgai, Arkupen, 09:00etan; kiroldegian izango da bazkari hori eta 640 lagunendako lekua dago.
Aurreko urteetan lez, kuadrillaka eman beharko da izena, eta bi menu egongo dira: helduena 17 eurotan eta umeena 13 eurotan. 12 urtetik gorakoek jateko izango dute patatak errioxar erara, saiheski errea eta txokolatezko browniea izozkiarekin. Eta umeek makarroiak tomatearekin, txahal-hanburgesa patatekin eta txokolatezko pasteltxoak.