Ekainean sinatu zuten Ibarra kiroldegiraino pasealekua luzatzeko obren kontratua Construcciones Legasko S.L enpresarekin. Joan den asteko Gobernu Batzordean, ostera, kontratu hori etetea onartu zuten. Izan ere, lan horiek geldi daudela ikusi dute. Dagokion erreklamazioa jarri, erantzukizuna eskatu, eta, legeak ezarritako epea eman zaiola enpresari erantzuna emateko jakinarazi dute Udal ordezkariek. Behin epea agortuta ez dutenez inolako erantzunik jaso, kontratua bertan behera uztea erabaki dela gaineratu dute.
Lanen amaiera atzeratu eta kostuak gora
Ondorengo pausuak lehenbailehen zehaztu eta obra ahalik eta azkarren martxan jarri gura du Udalak. Horretarako, proiektuaren
errebisioa eskatu diote Sestra ingeniaria aholkularitza-enpresari, eta horren ondoren, berriro lizitaziora aterako dute. Unai Elkoro alkateak jakinaraziko du atzeratu egingo dela lana: "Hasieran lau hilabetetako epea definitu bazen ere, izan dugun ustekabe honek atzeratuko du obraren amaiera. Uste dugu hasierako aurrekontua %20an igoko dela, balorazio berria egin behar baita; hala ere gure asmoa da lehenbailehen esleipena egin eta pasealeku berria egiteko obrak martxan jartzea". Urtarrilean lanak berriz abian izatea espero dute, eta lau hilabeteko epean bukatzea.