Udaberri eta uda sasoiko generoarekin dator asteburuan Ixadebalde

XVII.ez antolatu du Aretxarte merkatarien elkarteak Ixadebalde merkealdien azoka. Azkenak egindako lez, oraingo hau ere mojen komentuan izango da, egubakoitzean (10:00-14:00 eta 16:30-20:30) eta zapatuan (10:00-14:30), eta herriko sei merkatarik jarritako postuetan genero bikaina izango dela iragarri dute.

Beste batzuetan baino merkatari gutxiago elkartuko dira oraingoan, eta guztiek eskainiko dute janzteko generoa; batzuek arropa eta beste batek oinetakoak. Hona hemen komentuan izango direnak: Asensio, Belar Meta, Haurrak, Kilima, Tak eta Titare. "Gutxiago izaterakoan erosoago egongo gara eta herritarrek gura beste leku izango dute lasai begiratzeko", adierazi dute. Udaberri eta udako kontuak izango dituzte: "Merke-merke eta kalitate onenarekin, beti lez".

Merkatariekin batera UDAko kideak ere izango dira; bazkide txartelak banatuko dituzte bi egunotan.

Oparien zozketa

Ohi legez opariak ere izango dituzte merkatariek bertaratzen diren bezeroen artean banatzeko. Batetik, 100 euroko bonu bat zozketatuko dute Aretxarteko komertzioetan gastatzeko; eta bestetik, UDAko bi bazkidetza txartel banatuko dituzte.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.