1-2 eko emaitzarekin bukatu zen UDA eta San Ignacioren arteko lagunarteko partidua. Norgehiagoka parekatua izan zen, eta lehenengo zatian aretxabaletarrak aurreratu arren, arabarrek markagailua irauli eta garaipena lortu zuten.
Lehenengo zatian UDA izan zen nagusi eta San Ignaciori kosta egin zaion neurketan sartzea. Aukerak aretxabaletarrenak izan ziren eta honela iritsi zen Urzelaien gola 40.minutuan. Aritz Castro, San Ignacioko atezainak sekulako akatsa egin zuen eta egoera UDAko aurrelariak aprobetxatu zuen markagailuan aurreratzeko. Atsedenaldira 1-0 emaitzarekin iritsi ziren.
Bigarren 45 minutuak guztiz ezberdinak izan ziren. Talde arabarrak hartu zuen partiduaren protagonismoa eta hamar minututan 1-2 ekoa jarri zuten beraien alde. Santanok proba asko egin zituen, hainbat aldaketa eginez.
Porrota jaso arren, aurkezpenerako balio izan zuen atzokoak. Sergio Santano, entrenatzaile berriarekin batera, 6 fitxaketa etorri dira C.D Vitoriatik; Ander Maurazelaia, Mikel Lopetegi, Hugo Nogaledo, Mikel Gavilán, Mikel Maiz eta Jon Ander. Iaztik, 9-10 jokalarik soilik jarraitzen dute eta aldaketa sakona egon da aldagelan.
Hilabeteko atsedenaldia
Gaurtik aurrera oporrak izango dituzte jokalariek. Andramaixak bukatutakoan, hilak 18, Ibarrara itzuliko dira denboraldi berria prestatzeko. 3 aste izango dituzte aurretik, ligako lehenengo partidua baino lehen. Prestakuntza fasean, hainbat neurketa jokatuko dituzte, besteak beste, Mirandés B, Ariznabarra, Mondra eta Irubat en aurka.