Giza katerako 600 aretxabaletar elkartzea da erronka

Gure Esku Dago-k ekainaren 10erako egindako deialdiarekin dagoeneko 510 lagunek egin dute bat. Hasierako helburua beteta, 600 lagunera iristea da orain erronka, eta izena eman barik duten herritarrei deialdi masiboa egin diete egubakoitzerako, ekainaren 1erako.

Gero eta gertuago dago Gure Esku Dago-k ekainaren 10erako deitutako hitzordua. Donostia, Bilbo eta Gasteiz giza katearekin lotzea da erronka, eta, horretarako, 500 aretxabaletar eskatu zituzten Zigoitia inguruan, 185. kilometroa osatzeko.  

Aretxabaletako lantaldeko kideek joan den astean jakinarazi zuten 510 herritar zirela izena emandakoak. Lortutakoarekin poztu arren ez dute horretan geratu gura, eta hurrengo erronka zehaztu dute: 600 aretxabaletar batzea. Horretarako, "izen-emate masiboa" deitu dute egubakoitzerako, ekainak 1. Durana kalean duten behin-behineko egoitzara gerturatzera gonbidatu dituzte herritarrak, 19:00etatik 21:00etara bitartean. Deialdiarekin bat egiten dutenei, GEDren lelodun plastikoak emango dizkie balkoietan jartzeko.

Era berean, gogorarazi dute Zigoitira autobusean joateko txartelak aurrez hartu behar direla; horretarako azken eguna ekainaren 3a da. Autobus batzuk ekitaldia bukatu orduko Aretxabaletara itzuliko dira eta beste batzuek Gasteizera eroango dituzte herritarrak.

Erabakitzeko eskubidea izango da egun horretako aldarrikapenaren oinarria, eta horrekin batera jaiegun handia egingo dute. Aretxabaletarrek Zigoitikoak izango dituzte lagun kilometroa betetzeko.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.