Hona hemen adierazpena osorik:
"Xabier Rey Urmenetak 10 urte zeramatzan espetxean, Puerto de Santa Maria (Cadiz), bere senide eta lagunengandik 1.000km-tara. Atzo, hilik agertu zen.
Aretxabaletako udalak bere elkartasun sentituena eta babes osoa helarazi nahi dio Xabier Rey Urmenetaren senide eta gertukoei, eta gertaera honen aurrean sentitzen duen samina adierazi. Honekin batera, dei egin nahi diogu herritar orori, ideologiak ideologia, giza eskubideen defentsan aktibo izaten jarraitzeko, halako gertaera lazgarriak berriro errepika ez daitezen eta konponbidearen zein bakearen bidean urratsak eman ditzagun.
Gogoan izan behar dugu salbuespen legediak indarrean jarraitzen duen bitartean, asko direla Xabierren egoera bera bizi duten presoak eta baita larriki gaixorik egonda kartzelan jarraitzen duten presoak.
Horregatik eskatzen diogu Espainiako Gobernuari lehen bai lehen presoak bere etxe ondoetara ekartzeko urratsak eman ditzan eta gaixo dauden presoak aske utz dezan.
Bestalde, animatzen dugu Aretxabaletako herritarrak deituta dauden mobilizazioetan parte hartu daitezen".