Cataniako emakumearen omenezko eguna iristear da eta aurten ere kintoek ez dute hutsik egingo. 1999an jaiotako 45en bat neskamutilek jardungo dute kantuan eta eskean auzorik auzo domekan, Santa Ageda bezpera. Astelehenean, ostera, kalerik kale ibiliko dira eta ikastetxeetara eta enpresetara ere joko dute. Orduan egingo dute gainera, lehenengo dantza saioa Herriko Plazan (19:00), eta azken egunotako entseguetan ikasitakoa erakutsi herritarren aurrean.
Otsailaren 4an kantuan eta eskean ibiliko diren bakarrak ez dira izango. Basotxo erretiratuen elkarteko abestaldeak, azken urteotan lez, Santa Agedaren omenezko koplekin beteko ditu herriko kaleak; egoitzatik 18:00ak inguruan irten eta 20:00ak bitartean hainbat txokotan egingo dute kantuan. "Elurrarekin ere ibili izan gara, hortaz, iragarrita dagoen eguraldiak ez gaitu beldurtzen", adierazi dute abestaldekoek.
