Hotz egin du Ibarran, eta partidua ere halakoa izan da. Aurkariek ez dute ezer egin partidu guztian zehar; aukera gutxi izan dituzte. Aretxabaletak, aldiz, gola sartzeko hainbat aukera izan ditu lehen zatian, baina bigarrenean etorri dira hiru golak.
Ibon Perezek sartu du lehen gola 62. minutuan. Erdiraketa bat egin, eta Touring-eko atezainak baloia geratu arren, marra pasatuta hartu du, eta epaileak gola, ontzat eman du. Bigarrena, segidan etorri da, 65. minutuan. Julen Zaitegi izan da golegilea jokaldi bikain baten ostean, eta hirugarren golegilea, Aritz Castro izan da. Hala, 3-0 amaitu da Ibarrako partidua.
Berdinketa preferenteak
UDAko bigarren taldeak, berriz, derbia izan du gaur, Aloña Mendiren aurka, Azkoagainen. Oñatiarrak liderrak dira sailkapenean, eta partidua gol barik, puntuen banaketaz, 0-0 amaitu da.
