Haurren eta nerabeen eskubideen gainean jardun dute lanean azken egunotan herriko neska-mutikoek, azaroaren 20ko Haurren Eskubideen Nazioarteko Egunaren harira. Guraso Foroaren proposamena izan da, eta ikasteko eskubidea hartu dute lanketarako oinarri. Hain zuzen horren gainean egindako bertsoak eta marrazkiak egin dituzte Haur Hezkuntzako eta Lehen Hezkuntzako neska-mutikoek, eta lan onenak martitzenean saritu zituzten. Komentuan egindako ekitaldia Eneko Haritza kontalariak munduko ipuinak kontatuta bukatu zuten.
50 euroko bonuak
Aretxabaletako Guraso Foroak Baltistan Fundazioarekin lan egitea erabaki du, jakinik Baltistanen oraindik ere erronka dela neskatoen hezkuntza eskubidea. Hori aldarrikatzeko eta haiendako laguntza batzeko Elkartasun Jaia egingo dute egubakoitzean, azaroaren 24an, Herriko Plazan, 17:00etan hasita.
Umeendako eskulanak eta muralak egiteko –euro baten truke– mahaiak gertatuko dituzte ludotekako kideek, eta ondoren, txokolate beroa eta bizkotxoa eskainiko dituzte bi euroren truke –bizkotxoak egiteko boluntarioak behar dituzte; horiek 17:00etarako plazara eraman behar dira–. Eta Txurru DJak girotuta haurrendako berbena izango da 18:30etan hasita.
Dirua batzeko itsulapikoak jarriko dituzte eta 50 euroko bonuak ere izango dira. Bonu bakoitzarekin neskato baten urte osoko eskola gastuak estaltzen direla jakinarazi dute Guraso Foroko kideek. Elkartasun Jaian jasotako dirua hain zuzen, bonuak erosteko erabiliko dute.
