Udalak eta UDAk antolatutako bigarren Mendiko Bizikleta Martxa egingo dute domekan. "Helburua da kirola egin bitartean naturaz eta gure herriko inguru zoragarriez gozatzea", dio UDAko presidente Agurtzane Elkorok.
33 kilometro pasatxo dituen ibilbidea egingo dute bizikleta zaleek. 09:00etan irtengo da martxa Herriko Plazatik, eta besteak beste Mendiolatik, Areantzatik, Urkuluko urtegitik, Goroetatik eta Bedoñatik igaro ostean berriz ere hasierako puntura itzuliko dira. Zailtasun tekniko ertaineko ibilbidea da eta 1.300 metroko desnibel metatua izango du.
Izen-ematea
Martxan parte hartzeko izena eman beharko da. Domekan bertan eta Herriko Plazan izango da horretarako aukera, 08:30ean hasita. Federatuek 10 ordaindu beharko dituzte; federatu gabekoek 15; eta 14 urtetik beherakoentzat doan izango da.
Martxa amaitutakoan Kurtzebarri eskolan dutxatu ahalko dute hala gura dutenek, eta bizikletak garbitzeko mangera ere egongo da eskolako patioan.
