Goierritarrek egin dute partiduko lehen gola (0-1), baina Aretxabaletako neskek berdintzea lortu dute, Ane Vicenteren golari esker. Berdinketarekin heldu dira atsedenaldira.
Bigarren zatian bi gol sartu dituzte ordiziarrek eta abantaila polita eskuratu dute (1-3). Hala ere, Loitiren neskek ez dute amore eman eta golaren bila jarraitu dute. Berriro ere Ane Vicentek sartu du gola eta markagailuan gerturatzea lortu du Arizmendi (2-3). "Bukaeran indartsu geunden, indartu eta bizkortu egin gara. Hala ere, ezin izan dugu partidua berdindu, denbora falta izan zaigu", adierazi du Urri Urizar taldeko delegatuak.
Urizarren esanetan, "oso defentsa gogorra" zeukaten ordiziarrek eta Arizmendiri zaila egin zaio une askotan defentsa hori apurtzea. Gainera, aldaketa bakarra zeukaten aretxabaletarrek, jende gutxirekin zeuden. Beraz, lehenengo berdinketaren ostean, porrota izan da Arizmendirentzat eta igoera fasea ez dute gura moduan hasi.
