Abian da beste urte batez, Piztu Itxaropena Sahararen aldeko karabana. Saharar errefuxiatuek jasaten duten "elikadura krisi larria" arintzeko, Sahararen aldeko euskal karabana Donostiatik irtengo da hilaren 25ean.
Bide hori hasi arte, baina, janari bilketan buru-belarri dabiltza boluntario ugari Gipuzkoa osoan eta Aretxabaletako Kurtzebarri eskolan ere egin dute hainbat produkturen bilketa; arroza, lekaleak, pasta edota hegaluzea oliotan jaso dute, besteak beste.
Kurtzebarrin Saharara bidaltzeko batutako janaria.
Marrazki lehiaketa
Kurtzebarriko ikasleek marrazki lehiaketan ere hartu dute parte eta hain zuzen ere Zurriolatik aterako den kamioi batek Naroa Fernandez de Arroiabe ikasleak egindako marrazkia eramango du grafitigile talde batek margotuta.
Naroa Fernandez de Arroiabe ikasleak egindako marrazkia.
Aretxabaletako Kurtzebarri eskolako kideek, giza balioak lantzeko asmoz, errealitate hori gela barruetara eramatea pentsatu dute. Eta ohar bidez adierazi dute kanpaina hori ikastetxean aurrera eramatea "positiboa" izan dela, eta gaineratu dute "hunkigarria" ere izan dela hainbat ikasle sahararren esperientziak entzun ahal izan dituztelako.