Agerraldi horretan Eudelek proposatutako adierazpena irakurriko dute. Ondoren, bakarrizketa saioa dago Arkupen, 20:00etan; Maria la Vikinga eta Oscar Tramoyeres umoregileek jardungo dute emakumeen aurkako indarkeria gai hartuta.
Atxabaltako Feministak Elkartiak-eko kideak, berriz, 18:00 ingururako plazan izango dira, eta argazkiak aterako dituzte puntu morea aldean hartuta.
Berdintasuna eztabaidako gai
Azaroaren 25eko kontuak astelehenean egindako osoko bilkuran eztabaidatu zituen udalbatzak; izan ere, horren gaineko mozio bi aurkeztu zituzten.
EH Bilduk konpromisok hartzeko eskatu zion Udal Gobernuari mozio bidez: "Konpromiso zehatzak eta baliabideak behar dira indarkeria matxistari aurre egiteko. Horregatik eskatu dugu aurrekontuetan behar besteko partida sartzea eta Berdintasun Saila martxan jartzea", zioen Ion Albizu zinegotziak. Udal Gobernuak, baina, ezezkoa eman zion mozioari, eta datorren urtean ez dela Berdintasun Sailik izango ezta teknikaririk ere iragarri zuen: "Berdintasunak transbertsala izan behar duela uste dugu, eta udaleko sail guztietan barneratuta egon beharra duela. Ondorioz, 2017ko aurrekontuan partida bat zehaztuko dugu kanpoko enpresa bat hartzeko aholkularitza eman dezan", argitu zuen Ongizate zinegotziak, Karmele Uribarrik. EAJk aurkeztu zuen bigarren mozioa 2011ko Europako Hitzarmenarekin bat eginez; hau da, emakumeen aurkako indarkeria eta etxeko indarkeria prebenitzeko eta horien aurka borrokatzeko hitzarmenarekin; aho batez onartu zuten hori.
Alkateak gaineratu gura izan du "penagarria" dela halako eguna "beste interes batzuetarako" erabiltzea: "Beste helburu batzuetarako aprobetxatzen dabiltza".