Barriketan taldeak abian hasteko boluntario bila

Barriketan egitasmoak ikasturtea hasiko du urrian. Dagoeneko osatuta daude lau talde, baina gehiago sor daitezen boluntarioak gura dituzte. Argibideak eskatzeko eta izena emateko Loramendira jo behar da (azken eguna, urriak 30): udaletxe zaharra,  loramendielkartea@gmail.com eta 943 77 09 70. Auzokok, ostera, astelehenean hasiko du ikasturtea.

Euskaldun zaharrak eta berriak harremanetan jartzeko asmoarekin orain dela hamar urte inguru jarri zuten abian Aretxabaletan Barriketan. Helburua da euskara ikasleek eta euskaraz jakin arren berba egiteko ohiturarik ez dutenek, euskaraz berba egiten dutenekin jardutea. Horretarako, hiru edo lau laguneko taldeak eratu eta astean behin elkartzen dira besteak beste kafe baten bueltan, umeen inguruan edo bidegorrian paseatu bitartean. Euskaldun zahar zein berri, guztiendako dituzte zabalik ateak Loramendin, eta pozik hartuko dituztela horiek iragarri dute.

Auzoko lanean hastear

Auzoko egitasmoko kideek, ostera, ikasturtearen hasiera data jarrita daukate: astelehena, urriak 10, 15:00etan, udaletxe zaharrean. Loramendi elkarteak dauka horren ardura ere: "Ez dago aurrez inon izenik eman beharrik, nahikoa da bertara agertzea", jakinarazi du Nerea Zubillagak, Loramendi elkarteko kideak eta Auzokoren arduradunak. Herritarren arteko elkar ezagutzarako topalekua da hain zuzen Auzoko, euskara izanik komunikaziorako eta kohesiorako hizkuntza.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.