Urrian kanpai-joleak dira protagonista Arkupen

Mirari Altube Arrese 2016ko ira. 30a, 10:00
Arientzako kanpai-jole eskolako kideak Lleidan.

Kanpai-joleen argazkiekin beteko da Arkupeko erakusketa aretoa astelehenean. Argazki lehiaketa deitu zuen Arientzako kanpai-jole eskolak, Udaleko Kultura Sailaren eta mankomunitatearen laguntzarekin eta jasotako lanak jarriko dituzte ikusteko.

Guztira 123 lan jaso dituzte, 46 argazkilarik bidalitakoak. Horietako hainbat debagoiendarrak dira: arrasatearrak, aramaioarrak, eskoriatzarrak, antzuolarrak… Baina kanpotik ere bidali dituzte lanak: "Leku askotatik bidali ere: Madriletik, Sevillatik, Kantabriatik, Valentziatik, Ciudad Realetik, Bartzelonatik, Lleidatik, Cadizetik, Balear Uharteetatik… Baita itsasoz beste aldetik ere, Mexikotik hain zuzen", jakinarazi du Julen Abasolok, Arientzako eskolako kideak.

Kanpaien atzean dauden lagunak ezagutzera ematea izan da lehiaketaren helburua: "Eta horixe jaso dute ia argazki guztiek. Argazkiari komentario bat gehitzea ere eskatu genien, eta guretzat, Arientzako kanpai-joleontzat gehigarri ederra bilakatu da", dio.

Epaiaren berri urriaren 7an

Epaimahaiko kideek –Kultura Saileko ordezkari bat, argazkilari adituak eta kanpaien munduarekin zerikusia duten lagunak– argazkiotatik 30 bat aukeratuko dituzte, eta horien artean banatu gero sariak. Epaiaren berri urriaren 7an, hurrengo egubakoitzean, emango dute, baina sari banaketa eguna zehaztu barik daukate oraindik: "Irabazleek bertara etorri behar dute saria jasotzera, hortaz, horiekin adostuko da eguna. Edozein modutan ere urrian izango da", argitu du Abasolok, eta gaineratu: "Izan ere, lehiaketaren beste helburuetako bat Aretxabaleta jendeari ezagutaraztea da eta mapan kokatzea".
Argazkiak urria osoan egongo dira ikusgai Arkupen.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak