Tourmalet mendate mitikoa gurpil bakarraren gainean igo ondoren, orduko errekorra haustea izango da Aretxabaletako txirrindulariaren hurrengo erronka. Hitzordua irailaren 7an izango da Anoetako belodromoan. Guinness World Record saria jasotzeko ordea, 24,2 kilometroak gainditu beharko ditu Markel Uriartek.
Aretxabaletarra "ilusioarekin eta gogotsu" dagoela onartu du, eta Tourmaleten egin zuen balentriarekin alderatuta, Anoetan "oso azkar" joan beharko dela azpimarratu du: "Azkenean, Tourmalet lasai-lasai igo nuen, nire erritmoan. Orduko errekorra hausteko asko sakatu beharko dut", adierazi du.
