Goizean, hainbat ikastaro egin zituzten; ume eta helduendako hip-hop ikastaroa (bereziki arrakastatsua izan zen 8 eta 14 urte artekoena), swing eta kontakt inprobisazioa. "Helburua zen askotariko dantzak antolatzea, jendeari dantza desberdinak probatzeko aukera emateko", diote Jaiki taldeko kideek, eta azpimarratzen dute guztietan osatu zirela taldeak.
Eguerdi aldera, jam inprobisazio dantzaldia egin zuten, goizean ikasitakoa erakusteko. Arratsaldean, marrazketa eta mugimendu tailerra izan zuten kuartelean; gero, dantza ikuskizunak eta Rueda Cubana delakoa; bukatzeko, DJak. Denetara, bost ikuskizun izan ziren eta jende asko joan zen ikustera, eta parte hartzera ere animatu ziren.
Mugarik gabe
Jendeak oso gustura hartu zuen dantza integratu ikuskizuna, Donostiako bi talderen eskutik. Desgaitasunak dituzten dantzariek eta desgaitasunak ez dituztenek dantza egiten dute, erakusteko mugarik ez dagoela eta gogoa bakarrik behar dela dantza egiteko.
Jaiki taldeko kideek diote "egun polita" izan zela, eta eskertzen dute eguraldi txarrik ez zuela egin eta ikuskizunak kalean egin ahal izan zirela.
Haur Dantzarien Eguna ospatu dute domekan
Domekan, Haur Dantzarien Eguna ospatu zen, Leizarra musika eskolako taldeko, Arrasateko Lore Gazteak eta Txikitxu, Antzuolako Oinarin eta Soraluzeko Urrats taldeko dantzariekin. Guztira, ia 200 umek hartu dute parte eta antolatzaileak oso pozik gelditu dira: "Oso ondo joan da guztia. Goizean eguraldiarekin zortea izan dugu, eta euririk ez duenez egin, kalean ibili gara kalejiran. Justu umeak bazkaltzeko banatzen ari ginela sekulako zaparrada bota du 14:30ak inguruan, eta ikusita eguraldia aldakor zegoela, badaezpada arratsaldeko alardea frontoian egin dugu. Jende asko izan da ikusten eta oso pozik gelditu gara", adierazi du Leizarra musika eskolako zuzendariak.