Maiatzaren 12an izango da 'Euspot' lehiaketaren sari banaketa Arkupen

Sari banaketa ekitaldia datorren ostegunean izango da, maiatzak 12, Aretxabaletako Arkupe Kultur etxean, 19:00etan. Guztira, 2.000 boto jaso dituzte publikoaren sarirako, eta 220 boto lortu ditu datorren astean iragarriko duten irabazleak. Euskal Herriko leku askotatik iritsi dira spotak; Legazpi, Lazkao, Gasteiz, Tolosa...

Elkarlanean

Gipuzkoako Foru Aldundia, Aretxabaletako Udala, Mondragon Unibertsitatea eta Arteman Komunikazioa enpresa elkarlanean aritu dira. Gazteen parte-hartzea sustatu nahi izan da, eta, horretarako, harremanak indartu dira zenbait ikastetxerekin eta sektoreko eskolekin, eta erantzuna oso positiboa izan da.

Sari potoloak

34 lan aurkeztu dira aurten, Turismoa erakarri Gipuzkoa barnealdera gaiaren lelopean. Guztira, lau sari banatuko dira: gazteen saria (14-18 urte bitarteko gaztetxoen artean banatuko dena), 250 euro; publikoaren saria, 500 euro; Mondragon Unibertsitateko ikasle onenaren saria, 500 euro; eta spotik onenak 1.000 euroko saria irabaziko du.

Aurpegi ezagunak ekitaldian

Arratsaldeko zazpietan hasiko da  sari banaketa Arkupe kultur etxean. Bertan, parte hartu duten spot finalistak erakutsiko dituzte. Angel Alkain aktoreak girotuko du ekitaldia, eta, horrez gainera, Audionetwork musika-edizio etxeko arduradunak musika eskubideen inguruko hitzaldia emango du. Ekitaldia amaitzeko, luntxa egongo da han batzen diren guztiendako.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.