Europako musikarien doinuek girotuko dute herria

Mirari Altube Arrese 2016ko mai. 5a, 15:20
Loramendi taldeko txistulariak eta Leizarra musika eskolako bandako kideak.

Musika eskolen Europako jaialdiaren 12. edizioari esker 8.500 ikasle elkartu dira egunotan Donostian, eta egubakoitzean eta zapatuan Debagoienera ere iritsiko dira horiek, kontzertuak eskaintzeko. Emusik jaialdia maiatzak 6an inauguratuko dute Illunben egingo duten ekitaldian, eta han izango dira Leizarra musika eskolako hainbat ikasle eta irakasle, 50 lagun inguru.

Albaceteko Caudete herriko Santa Cecilia musika eskolako kideak eta Letoniako Marupe herrikoak etorriko dira egubakoitzean, Aretxabaletara: "17:00etan egingo diegu harrera taldeei, eta ondoren, Unai Elkoro alkateak hartuko ditu udaletxean", jakinarazi du Mariatxen Urkiak, Leizarra musika eskolako zuzendariak.

Herriko Plazan (euria eginez gero Iturrigorri pilotalekuan) 18:00etan elkartuko dira Leizarra musika eskolako kideekin batera; honako hauek izango dira: banda, abesbatza, konbo taldea, dantzariak eta Loramendi txistulari taldea. Agurraren ostean Europako ereserkia joko dute elkarrekin, eta, talde bakoitzak egindako saioen ondoren, Emusik jaialdirako asmatutako Musikatu bizitza kantua joko dute.

Zapatuan, Alemaniakoak eta Suitzakoak

Zapatuan, beste bi talde etorriko dira: Alemaniako Waldshut Tiengen herriko musika eskolako kideak eta Suitzako Gelterkinden eskolakoak. 11:00etan egingo diete harrera, eta ondoren alkatearen ongietorria jasoko dute udaletxean. Kontzertua 12:00etan izango da plazan (edo pilotalekuan). Oraingoan ere Europako ereserkia joko dute lehenengo guztiek elkarrekin eta gero etorriko dira Alemaniakoen saioa, Suitzakoena eta hirugarren, herrikoena. Ekitaldia bukatuko dute, oraingoan ere, Musikatu bizitza kantuarekin.

Emusik jaialdia agurtuko dute zapatu iluntzean, Donostian egingo duten festarekin.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak