Kanpai-joleak gaitzat hartuta argazki lehiaketa deitu dute Udalak eta kanpai-jole eskolak

Kanpai-joleak Otala Zelain.

"Kanpaien mundura gerturatzeko" asmorekin argazki lehiaketa antolatu dute Arientzako kanpai-jole eskolak eta Udaleko Kultura Sailak, Debagoieneko mankomunitateko turismo sailak lagunduta. 18 urtetik gorako edonork har dezake parte eta lanak aurkezteko epea 2016ko ekainaren 1etik irailaren 15era bitartekoa da.

Hona hemen oinarriak

1. Gaia: Kanpai-joleak

Kanpai-joleak gaiarekin zerikusia duten argazki onenak saritu nahi ditu lehiaketak.

Parte-hartzaileak kanpaien mundura gerturatzea nahi da, kanpai-joleak bilatu eta aurkitzea eta beren argazkietan haien alderik gizatiarrena erakustea, geroz eta inpertsonalagoak eta mekanikoagoak diren kanpai hotsen gainetik.

2. Parte-hartzaileak

18 urtetik gorako edozeinek parte hartu ahal izango du, epaimahaikideak salbu. Parte hartzea doakoa da.

3. Lanak

Parte hartzaile bakoitzak gehienez ere 3 lan aurkeztu ahal izango ditu; lanak originalak, argitaratu gabeak eta lehiaketetara aurkeztu gabeak izango dira.

Argazkiak 2016 urtean zehar ateratakoak izango dira.

Argazkiak ezingo dira aldatu, ez elektronikoki ezta beste era batera ere. Era berean, ez da fotomuntaketarik onartuko. Kolorea eta argitasuna zuzentzea soilik baimenduko da. Nolanahi ere zalantzarik sortuko balitz Raw artxiboa eskatu ahal izango zaio egileari egiaztatu ahal izateko.

4. Aurkezpena eta bidalketa

Argazkiak, originalak izango direnak, zuri-beltzean edo koloretan aurkeztu ahal izango dira.

Argazki horien erresoluzioa 300 pp.koa (pixelak hazbeteko) izango da, 10 Mb-ko gehienez.

Argazkiak e-mailez bidaliko dira (argazki bat bidalketa bakoitzeko) ondorengo helbide elektronikora: Arientzako kanpai jole eskolako helbidera: kanpaijoleak@gmail.com edo Aretxabaletako Udaleko Kultura departamendura: kultura@aretxabaleta.eus

Argazki bakoitzean jarri beharko da:

  • Titulua
  • Argazkia hartu zeneko lekua eta eguna
  • Eskertuko da, argazkiari buruzko azalpenen bat
  • Egilea: izen-abizenak, NA, helbidea, telefonoa eta e-maila

Parte hartzaileak datu errealak eta egiaztagarriak eman beharko ditu. Ezinbestekoak izango dira telefono zenbakia eta e-maila, horiexek izango baitira erakundeak erabiliko dituenak, parte hartzaileei irabazle izan direla jakinarazteko.

5. Onarpen epea

Epea 2016ko ekainaren 1etik irailaren 15era bitartekoa izango da, (biak barne). Ez da, irailaren 15az geroztik aurkeztutako lanik onartuko.

Antolakuntzak argazki bakoitzari zenbaki bat emango dio, lehiatzeko eta epaileek identifikatzeko.

Argazki bakoitza posta elektronikoz jaso ahala, jaso izanaren mezua bidaliko zaio aurkeztu duenari. Mezuan bertan, argazkiari lehiaketan parte hartzeko eman zaion zenbakia adieraziko zaio. Argazki bat bidali ondoren erantzunik jasotzen ez bada esan nahi du antolatzaileek ez dutela argazki hori jaso eta ondorioz delako argazki horrek ez duela lehiatuko.

6. Sariak

  • 1. saria: 600 € + aste buru bateko egonaldia Aretxabaletan
  • 2. saria: 300 € + aste buru bateko egonaldia Aretxabaletan
  • 3. saria: 100 € + aste buru bateko egonaldia Aretxabaletan

Egonaldia bi pertsonentzat eta bi gauekoa izango da eta sari banaketako egunarekin bat etorriko da. Hori horrela sari banaketa eguna sarituekin adostuko da. Nolanahi ere, urrian izango da (hilabete horretan izango baita erakusketa)

7. Epaimahaia

Epaimahaia osatu dute: Udaleko Kultura Saileko ordezkari batek, bertako argazkilari ospetsuek eta kanpaien munduarekin zerikusia duten pertsonek.

Epaimahaiak, finalista geratu diren hogeita hamar lan aukeratuko ditu erakusketa bat egiteko. Aukeraketa egiteko sorkuntza eta kalitate teknikoko irizpideak hartuko dira kontuan batetik eta argazkiek erakusten duten alderdi etnografikoa edo gizatiarra bestetik. Argazki horien artean hiru onenak aukeratuko dira eta horiek izango dira sarituak.

Lehiaketako argazkiak Aretxabaletako Arkupe kultur etxeko erakusketa gelan erakutsiko dira, 2016ko urrian.

8. Epaia

Epaimahaiak urriaren 7an emango du epaiaren berri.

Antolakuntzak berarentzat gordetzen du, baldintzak betetzen ez dituzten parte hartzeak baztertzeko eskubidea

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.