Mota ezberdineko 150 landare inguru sartu dituzte Zuhaitz Egunean

Zuhaitz Eguna ospatu dute gaur Aretxabaletan urtero moduan. Erantzun ona izan du ekintzak, izan ere, jende ugari hurbildu da Aretxabaletako plazara, handik Untzillara bidean dagoen autopista azpiko lursailera joateko. Gurasoak umeekin batera oinez igo dira, eguraldi bikainarekin, eta aitzurrak eta landareak hartu ondoren, 150 zuhaitz inguru landatu dituzte.

Leku berezira joan dira zuhaitzak landatzera, Anabel Diez Aretxabaletako udaletxeko teknikariaren esanetan: "lursail handia dagoen lekura etorri gara, eta autopista azpian landatzea esanguratsua izan da. Bestalde, umeei zuhaitzak landatzea zer den erakustea dugu helburu, eta ekintza sinbolikoa izan arren, jende asko gerturatu da".

Umeak landatzen ikasten

Diputazioko Arizmendi mintegitik, eta landaketa taldetik 150 zuhaitz inguru ekarri dituzte egunerako, besteak beste: haritzak, urkiak, artiak eta gorostiak. Gurasoak zuloak nola egin erakusten ibili dira txikienei, eta umeak aldiz, poz-pozik sartu dituzte landareak bertan. Zuhaitzak landatu ostean, hamaiketako ederra eginaz eman diote amaiera egunari.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.