Zuhaitzak landatzera joateko deia domekarako

Familia zuhaitzak landatzen iaz.

Urkiak, haritzak, arteak, hurritzak eta beste hainbat zuhaitz mota, ehundik gora, landatu gura dituzte domekan, otsailak 21. Iaz legez, Untzilla auzora bidean dagoen Egileor baserri ingurura joko dute, autobidearen zubi azpira, hain zuzen ere. Hala ere, Herriko Plazan elkartuko dira 11:00etan, eta handik elkarrekin joan landaketa gunera. 

Herriko Landaketa taldearen laguntza izango du beste behin Udalak, bai landatze lanetarako, bai koordinazio kontuetarako. Baita Kurtzebarri eskolako eta Arizmendi ikastolako neska-mutikoena eta horien gurasoena ere. Iaz, 100 bat lagun elkartu ziren, nahiz eta euria egin, eta 180 bat zuhaitz landatu zituzten, eta aurten ez dute gutxiago izan gura: "Udaleko Ingurumen saileko kideok parte hartzera gonbidatzen ditugu ikasleak, gurasoak eta herritarrak", jakinarazi dute. Bai zuhaitz landareak, bai horretarako behar diren tresnak antolatzaileek jarriko dituzte, hortaz, lanera doazenek arropa eta oinetako egokiak bakarrik eraman beharko dituzte. Egileor baserri inguruko lursaila Udalarena da, eta poliki-poliki zuhaitzez betetzea da haren asmoa. 

Goiza lanean jardun ondoren hamaiketakoarekin emango dizkiete eskerrak udal ordezkariek elkartutako guztiei, eta hala, indarrak berreskuratu.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.