Mundukideren proiektuak Arkupeko protagonista

Mirari Altube Arrese 2016ko urt. 8a, 13:26
'Batu taupadara' egitasmoaren berri ematen duen kartela.

Hamabost urte bete dituela aitzakia hartuta orain arte egindako lanaren, filosofiaren eta emaitzen berri ematen dabil Mundukide GKE, eta urtarrilean Arkupe kultura etxeko protagonista izango da. Batu taupadara argazki erakusketa zabaldu dute astean urtarrilaren 17ra bitartean, eta eguaztenean, hilaren 13an, Kapulana bat zintzilik emanaldia eskainiko du Miren Amuriza bertsolariak, 19:00etan. 

Mozambiken, Brasilen eta Kuban martxan dituen zazpi programen gaineko argibideak batzen dituen argazki erakusketa ekarri du Mundukidek Arkupera. "Asmoa da orain arte egindako lanaren berri ematea eta Mundukide zer den, dituen balioak, eta gizartea eraldatzeko duen helburua ezagutzera ematea", dio Josu Urrutiak, Mundukideko zuzendariak. Eta horren guztiaren berri emanda bazkide gehiago egin gura dituzte: "Proiektu gehiago martxan jarri ahal izateko aukera eta beharra dagoelako".

Bertsoak eta ipuinak 

Erakusketa hori bertsoekin eta ipuinekin jantziko du Amuriza bertsolariak eguaztenean, 19:00etan, Kapulana bat zintzilik emanaldiarekin. Kapulanak dira Mozambikeko emakumeen oihal koloretsuak, hainbat erabilera dauzkatenak: umeei lepoan eutsi, jatekoa bildu eta etxeak apaindu, besteak beste. Emanaldian kapulana bat zabaldu eta han gordetako kantu, kontu eta irudiak aterako dituzte: "Mozambikeko lurrazalaren historiatik hasita, emakumeen eskuetako azal zimurrak irakurtzeraino egingo dugu bidaia", diote elkarteko kideek. Bien bitartean, kooperazioaren, nekazaritzaren, haurtzaroaren eta hizkuntzaren gainean jardungo du ia ordubetez Amurizak, Eider Eibarren ilustrazioak lagun dituela. 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak