Gastronomiaren eta folklorearen topalekua izango da Herriko Plaza, domekan

Txitxi-burruntziak gertatzen iaz, plazan.

Hemeretzigarrenez egingo dute gastronomia eta folklore jaia domekan, Aretxabaletako Udalak antolatuta Zaraia mendizale taldearen laguntzarekin. Eta beste behin elkartuko dira Gaztela Leon, Extremadura, Galizia, Errioxa eta Euskal Herria ordezkatzen dituzten taldeak. 10:00az geroztik eta ilundu bitartean, gastronomiak Herriko Plazan izango du lekua, dantza eta kantu emanaldiak ere han egingo dituzte, eta patxaran lehiaketa ere bai.

Errioxako Voces del Ebro taldeak jota doinuekin girotuko du plaza. Donostiatik etorriko diren Galizia etxekoak eta Laudiotik hurreratuko diren Gaztela Leongo San Fernando taldeak, ostera, dantza emanaldiak eskainiko dizkiete elkartutakoei. 

Extremaduraren ordezkari izango da Arrasateko Corazon de Encina elkartea eta Euskal Herriarena, Aretxabaletako Aratz  (adimen urritasuna dutenen aldeko taldea). Guztien artean eskainiko dituzte urdaiazpikoa, olagarroa, txitxi-burruntziak, hestebeteak, gazta eta beste hainbat jateko, beti ere edateko goxoak lagun eginda: finoa, Errioxako ardo, sagardoa…

21. Patxaran Lehiaketa

Patxaran lehiaketari ere egingo diote lekua azken urteotan legez. Herriko Plazan jarritako mahaira eroan beharko dira horiek 11:00etatik 14:00etara bitartean. Norberak egindakoa izan beharko du patxaranak eta kristalezko edo beira gardenezko botilan aurkeztuko da (gehienez bi); botilen originaltasuna ere hartuko dute kontuan.

Epaimahaiak hiru onenak sarituko ditu; garaikurra eta diru-saria emango diete horien egileei. Ondoren, hiru patxaranak enkantean jarriko dituzte lote bakar batean, eta eskaintzarik altuena egiten duenari emango dizkiote. Gainerakoak plazako gunean izango dituzte, jendeak proba ditzan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.