Urteak daramatzate elkarrekin bikote moduan kantatzen. "Ondo moldatzen gara taularen gainean, horretarako ezinbestekoa da bizitzan ondo eramatea, etsaiarekin ezin da lanik egin; nik ez behintzat" dio Zubiriak eta zera gaineratu du: "Edortak badu bere taldea, Guajiroak, bertsioak egiten dituen Nafarroako taldea, eta horiekin gustura jarduten du, musikari profesionalen zurrunbiloan murgiltzeko asmo handirik barik. Nirekin, baina, salbuespena egiten du. Badira Edorta baino musikari osatuagoak, profesionalagoak; askorekin kantatu izan dut, baina berarekin beste konplizitate bat dut. Euskal kantu asko dakizki nik baino gehiago, eta abantaila handia daukat horrekin. Bikoteak egin behar ditugunean prest izaten da elkarrekin jotzeko eta erraztasun handiak ematen dizkit. Ez naiz oroitzen noiz eta nola hasi ginen horrelako emanaldiak egiten, norbaitek zerbait berezia egiteko eskatuko zidan seguru, eta nik semeari proposatu, hark ezetz esango zidan hasieran, eta baiezkoa gero. Gitarra eskuan izaten du berak eta horrez gainera, kantuan ere laguntzen dit".
Zubiriarenak eta tradizionalak
Ordubete eta erdi inguruko emanaldia egingo dute, kantu propioekin eta herrikoiekin osatuz errepertorioa: "Nire abestiak izaten ditugu oinarri, baina, jakina denez, hastapenetatik izan dut kantu herrikoiekiko lotura handia eta, nola ez, eroriko dira bai, horietako batzuk ere. Orokorrean, entzuteko kontzertua izango da baina azken bisetan, ikusleekin batera kantatzeko gonbidapena egingo dugu".
Mikroa alboratzeko asmorik ez
Modak etorri eta joan egiten direla dio Zubiriak baina publiko fidela duela ere aitortzen du; hortaz, ahal duen artean, kantuan jarraitzeko asmoa duela dio.