Nobedadeak izango dira nagusi aurtengoan. Izan ere, udaleku irekiek eta kirol udalekuek bat egingo dute eta Lehen Hezkuntzako hirugarren mailatik seigarren mailara artekoak astean hiru goizetan Ibarra kiroldegira joango dira. "Ekintza batzuk kiroldegian egingo dituzte eta beste gutxi batzuk kirol zelaian", jakinarazi du Maider Etxanizek, Gazteria Zerbitzuko teknikariak. Eta egingo dituzten kirol ekintzak zeintzuk izango diren jakinarazi du: xunba, errugbia, hockeya, igerian, eskalada eta multikirola. "Horren asmoa da beste kirol batzuk probatu eta ezagutzera ematea gaztetxoei". Eta Lehen Hezkuntzako lehenengo eta bigarren mailakoek, 6 eta 8 urte artekoek, igerilekura joateko aukera izango dute.
Gaztetxoen iritziak jaso
Bestetik, urtero arrakasta duten ekintzei eutsiko diete aurten ere, horien artean daude San Fermin eguna eta mendira irteerak. "Egitarau horri esker kalea, natura eta kirola bateratuko dituzte neska-mutikoek", argitu du Gazteria teknikariak, eta gaineratu du: "Horiez gain sukaldaritza kontuak ere landuko dituzte hainbat gaztetxok".
Eta beste berrikuntza bat ere iragarri du Etxanizek: "Azken astean zer egin erabakiko dute haurrekin. Asanbladak egingo dituzte horiekin euren iritziak eta nahiak jasotzeko. Eta posible den neurrian horiek aurrera eramango dituzte".
