Barkerok UDAko ohorezko erregionalean jokatzeko fitxa dauka

Jose Javier Barkero futbol zelaian, entrenatzen dituen mutikoak atzean dituela.

Jose Javier Barkerok ohorezko erregionaleko taldearekin jokatu ahal izango du. Dagoeneko badauka fitxa horretarako. UDAko kirol zuzendari den Igor Arenazak jakinarazi du "larrialdi kasuetarako" izango dela fitxaketa: "Gure asmoa ez da geratzen diren partidu guztiak jokatzea. Izan ere, taldearekin entrenamendu bakarra egiten du orain".

Ohorezko erregionaleko hainbat jokalari ezin jokatuta dabiltza azken asteotan lesioak eta zigorrak tarteko. Hala, orain dela bi aste Hernaniren aurka jokatzeko azpiko mailako hainbatekin joan behar izan zutela jakinarazi du Arenazak: "Baina azpiko mailatik gura beste jokalari ezin ditugu hartu. Eta igoera fasea jokatu behar izanez gero jokalariak behar ditugu". Horregatik pentsatu dute Barkerorekin.

Atzo goizean egin zioten fitxa eta taldeari ere atzo jakinarazi zioten.

Bost partidu denboraldia bukatzeko

Denboraldia bukatzeko bost partidu geratzen dira, eta sailkapeneko bigarren postuan dago Gorka Valleren taldea, 59 punturekin. Lehenengo dagoen Ondarroako Aurrera harrapatzea zail du (67 puntu), baina atzetik datorren Tolosak (52 puntu) aurrea hartzerik ez du gura hirugarren mailara igotzeko aukerei eusteko. Hala, indar berriak gustura hartuko ditu taldeak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.