Martxoan egin zuen lehen bilera herriko txakurren jabeekin. Orduan gogorarazi zien Lore Martinez Axpe zinegotziak abian dagoen ordenantza eta txakurren kakekin dagoen arazoa. Jabeek, ostera, animaliak aske ibiltzeko guneak eskatu zizkien. Gai horiei guztiei berriro heltzekotan geratu ziren orduan eta bigarren batzarra astelehenean izango da.
Txakurrak zelan hezi
Txakurren heziketa izango da hurrengo bileran landuko duten gaietako bat. Eta horren gainean jarduteko Orekan elkarteko txakur hezitzaileak izango dira bertan.
Bestetik, txakurren kaken gainean jardungo dute. Animaliak eta hiria: beraien beharrak gure ardura hitzaldia eskainiko du Bubasti elkarteko Josune Gomez Lagok. "Animalien kaken kontua osasunaren ikuspegitik landuko dugu: gorotzak, parasitoak, errespetua…", jakinarazi du Martinez Axpek. Hain zuzen gorotzendako zaborrontzi berriak jarri dituzte azken hilabetean; hamabost dira, laranja kolorekoak.
Eta bukatzeko txakurrak lotu barik ibiltzeko guneak izango dituzte berbetagai. Udal ordezkariek horretara bideratutako bi gune aurkeztuko dizkiete jabeei.
Errolda eguneratu
Udalak herriko txakurren errolda eguneratu gura du, gainera. "Erregistroa gaurkotu eta eguneratuta izan gurako genuke. Horretarako albaitariari adieraztea eskatuko dugu, baita udaletxean alta eta baja ematea ere", dio Martinez Axpek. Egun 500 txakur inguru bizi direla Aretxabaletan uste dute.
