Urtero egiten duten eskolen arteko topaketa da, herriak txandakatuz egiten dutena. Bigarrenez egingo dute Aretxabaletan. Gaurkoan, 100 ikaslek ikasgelatan ikasitakoa erakutsiko dute, 12 irakasleen gidaritzapean, harmailetan batutako senide eta lagunen aurrean.
Elkarri lekukoa hartuz
Adin guztietako musikariak igoko dira taularen gainera, haurrak eta baita helduak ere. Anfitrioien agur dantzarekin ekingo diote. Segidan eskolak txandakatuaz joango dira askotariko doinuak erakutsiz; horien artean, euskal kantu ezagunak. Akordeoi eta batukada doinuak eskainiko dituzte oñatiarrek; Bergarakoek kamara boskotea ekarriko dute eta Arrasatekoen perkusio taldea izango da hurrengoa. Kantuan egingo dute segidan Eskoriatzakoek; eta flauta eta combo doinuekin borobilduko dute etxekoek.