Asfaltoa botatzeko lanak hasi dituzte Otalora kalean

Galtzada-harria duen Otalora kalearen tartea.

Astean hasi dira Otalora kalea konpontzen. Galtzada-harria kendu eta inprimatutako asfaltoarekin egokituko dute lau metroko zabalera duen bidea. 57.524 euroko aurrekontua dute lanek eta Probisa Vias y Obras SLU enpresak egingo ditu hilabeteko epean. Lanen ondorioz, kale tarte hori itxi egingo dute eta Errekabarren kaleko autobus geltokia ezingo da erabili.

Ibilgailu asko pasatzen da egunero-egunero Otalora kaletik eta gurpilen presioaren ondorioz galtzada-harrien azpian dagoen morteroa desegin egiten da. Horrek sortu ditu salto txikiak, putzuak, hondoratzeak eta beste hainbat traba kalean. Eta egoera eskasean utzi du galtzada-harria dagoen kale tartea. Hala, Udalak erabaki du galtzada-harri itxuradun inprimatutako asfaltoa jartzea.

Kalea itxita

Lanok egiteko itxi egingo dute kale tarte hori, eta ibilgailuek, autobusak tartean, Txarapea ibilbidetik egingo dituzte joan-etorriak. Ondorioz, Errekabarren kaleko geltokia ezingo da erabili, eta kuartel parean eta Loramendi kalean bakarrik geratuko dira Arrasatetik datozen autobusak.

Ahalik eta eragozpen gutxien sortzeko Basabe bidea eta Durana kalea zabalik egongo dira 24 orduz. Otalorako hamaikagarren atarteko garajeetara sartzeko, ostera, behin-behineko pasabidea egokituko dute.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.