Udal eta Foru hauteskundeak 2015

Miren Lana da PSE-EEren Aretxabaletako alkategaia

Mirari Altube Arrese 2015ko ots. 18a, 10:48
Miren Lana alkategaia.

Alderdi Sozialistak jakinarazi du Miren Lana, 49 urteko arrasatearra, izango dela Aretxabaletako PSE-EEren alkategaia datozen Udal hauteskundeetan. Arrasateko zinegotzia da orain, eta Jose Luis Lanaren, Alderdi Sozialistako kide historikoaren, alaba.

Lanak adierazi du Bilduk gobernatu duela Aretxabaleta "zorrotz" eta "inposizio bidez", eta horren adibide dela atez ateko sistema ezartzeko izandako jarrera "autoritarioa": "Sistema zaharra da, zikina, deserosoa, garestia eta kontrol politikoa dariona", dio eta gaineratu: "Atez atekoaren aurka agertutako herritarren kontra egin du Bilduk".

Alderdi Sozialistaren zerrendaburuak konpromisoa hartu du atez ateko bilketa sistema "kentzeko" eta edukiontzi bidezko bilketa ezartzeko, organikoarendako edukiontzi marroia jarrita. Era berean, zera esan du: "Inposizioa, autoritarismoa eta informazioaren manipulazioa ez da udal bat gestionatzeko modua". Horregatik "adostasunetara iristeko" lan egingo duela dio.

Ibarra kiroldegiari dagokionez eskatu du "kalitatezko gestio publikoa", eta 2012an hiruko enpresen elkarteak izandako defizita bere gain hartzearen aurka agertu da.

Eta gaineratu du "enplegua sortzeko" neurrien alde egingo duela lan eta "kalitatezko zerbitzu publikoak" bermatzearen alde. Horregatik talde ahulenengan eta krisiaren ondorioz gaizki pasatzen dabiltzan horiengan oinarrituko duela gestioa. "Herriaren garapen ekonomikoan eragile aktibo izateko obligazioa du Udalak, eta hori hala izan dadin ahaleginduko gara Aldundia eta Jaurlaritzarekin batera. Hala, enpleguaren aldeko politikak piztu eta merkataritza eta turismoa dinamizatu behar dira, talde guztiak inplikatuz jarduera ekonomikoan".

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak